Залаты ўзрост – самы час быць актыўнымі!

На пачатку кастрычніка ў нашай краіне традыцыйна праходзіць Дзень пажылых людзей. Сёлета ў Віцебску тамтэйшыя пенсіянеры вырашылі правесці яго адметна. 3 кастрычніка тут прайшоў Міні-марафон «Самы час!». Арганізатарамі выступілі Прадстаўніцтва Еўрапейскага Саюза ў Беларусі і Віцебскі гарадскі выканкам, партнёры – абласная арганізацыя Беларускага Таварыства Чырвонага Крыжа і клуб пажылых людзей «Золотой возраст».

Мэтаю мерапрыемства стала папулярызацыя актыўнага і здаровага ладу жыцця сярод людзей старэйшага ўзросту.

– Традыцыйна старэнне асацыюецца з пагаршэннем здароўя, – зазначае кіраўнік клуба «Золотой возраст» Ванда Андрэеўна Цюлькова, – з пасіўнасцю, адзінотаю і выключанасцю з жыцця грамадства. Прымаючы такія стэрэатыпы, мы часцяком перастаем верыць у свае сілы, пачынаем недаацэньваць сябе і свае магчымасці. Таму вельмі важна разбурыць стэрэатыпы і нароўні з актыўным старэннем прасоўваць пазітыўны вобраз людзей старэйшага веку як цалкам у грамадстве, гэтак і сярод саміх пажылых людзей. Самы час – гэта сёння, у гэты дзень, у гэтую хвіліну!

Тут карысным будзе і досвед краінаў Еўропы, дзе блізу 27% людзей, старэйшых за 55 гадоў, уцягнутыя ў валанцёрскую працу ў разнастайных грамадскіх арганізацыях. Адначасова пажылыя людзі імкнуцца браць удзел у прыняцці рашэнняў, што тычацца іх саміх. І маладзейшыя іх землякі лічаць, што мясцовыя ўлады павінны ствараць спецыяльныя камітэты, куды ўваходзяць людзі старэйшага веку, для правядзення кансультацыяў перад прыняццем рашэнняў, што тычацца іх.

Пасля рэгістрацыі і медыцынскага агляду ўдзельнікаў у паркавай зоне «Віцьба» быў дадзены старт марафону. Усяго ўдзел узялі 72 чалавекі. Удзельнікам неабходна было пераадолець два з паловаю кіламетры, дапускаліся бег, скандынаўская і звычайная хада. Пад час свята ўдзельнікі і госці маглі таксама наведаць майстар-класы па скандынаўскай хадзьбе, атрымаць парады ад равеснікаў, якія не адзін год займаюцца хадзьбою з кіямі. А валанцёры з Чырвонага Крыжа правялі трэнінг па аказанні першай медычнай дапамогі. Скончылася мерапрыемства ўрачыстым узнагароджваннем пераможцаў. Першае месца ў катэгорыі да 70-і гадоў занялі: сярод мужчынаў – Пётр Васільевіч Карняленка (63 гады), сярод жанчынаў – Святлана Аляксандраўна Салаўёва (60 гадоў); у катэгорыі пасля 70-і: сярод мужчынаў – Уладзімір Рыгоравіч Фефелаў (73 гады), сярод жанчынаў – Вера Кірылаўна Бяляева (74 гады). Найстарэйшым жа ўдзельнікам Міні-марафону стала Валянціна Андрэеўна Дышлеўская (83 гады).

Падрыхтаваў

Уладзімір ПУЧЫНСКІ