Гавары са мной па-беларуску
Сябры, ужо хутка, 21 лютага, мы будзем адзначаць Дзень роднай мовы, і з гэтае нагоды я падабрала з вашых лістоў нізку вершаў па-беларуску. Перачытваю іх і не магу начытацца, не магу наталіцца словам…
Дата 21 лютага была выбраная невыпадкова. Менавіта ў гэты дзень у 1952 годзе пад час мірнай дэманстрацыі загінулі пяць студэнтаў. Яны змагаліся за тое, каб ва Усходнім Пакістане была прызнаная дзяржаўнай бенгальская мова. З таго дня мінула амаль два дзесяцігоддзі, і Рэспубліка Бангладэш стала асобнай дзяржавай. Цяпер на бенгальскай мове размаўляе 98% насельніцтва краіны. У 1999 годзе Генеральнай канферэнцыяй ЮНЕСКА 21 лютага быў зацверджаны як Дзень роднай мовы.
Каб не мова, даўно б мы растаялі,
расплыліся б імглой між чужых,
збеглі ў вырай гусінаю стаяю…
Але з мовай – і мы будзем жыць, –
пісала Наталля Арсеннева, а Алесь Разанаў казаў:
Празрысты звон,
грымотны грукат,
скалісты свіст,
магутны гул –
усе
разрозненыя гукі
цяклі,
каб зліцца
у агул.
Хісталі
ўздыбленыя далі,
глыбаста білі ў небасхіл.
I ў немату
не прападалі,
а западалі
і раслі.
I ціш і гром,
і звон і шорах
спляліся
ніткаю радства, –
калі з грудзей,
нямых і чорных,
аднойчы
мова прарасла.
Я ўпэўненая, што вершы нашых чытачоў – гэта таксама парастак, маленькі і моцны адначасова, на старадаўнім дрэве нашай роднай мовы.
Вядучая рубрыкі
Ніна КАЗЛЕНЯ
Вольга КРЫВАНОСАВА (Орша)
Наша мова
Дзе ж ты заблукала, наша мова?
Мо нас хто знявагай атруціў
За любоў да беларускіх словаў,
Што свой кут цябе не прытуліў?
Як пяшчотна, як гучаць лагодна
Словы беларускія, свае!
А каб размаўляць усім народам,
Нечага, відаць, нам не стае.
Я таксама мовы не цураюся,
Але ж размаўляю не на ёй.
Пакаянна галавой схіляюся
Перад роднай моваю маёй.
Зрэдку ўвечар вершы пачытаю –
Я ж дачка краіны Беларусі.
З дзіўнай асалодай і адчаем
Любай нашай мовай ганаруся.
* * *
Калісьці, яшчэ ў школе,
Настаўніца нам казала:
– Размаўляйце на роднай мове,
Каб яна зусім не прапала.
Калі ласка, паслухайце, колькі
Словаў у ёй мілагучных,
Ды не кажыце толькі,
Што на ёй размаўляць нязручна.
Вы чуеце, як пяшчотна
Слова гучыць «калі ласка».
Кажыце яго з ахвотай,
Яно ўжо само – як казка.
А сэнсу, чуеце, колькі
У слове адным «кахаю»?
Яго чалавеку толькі
Каханаму прамаўляем.
– Шануйце родную мову, –
Настаўніца нам казала. –
З пяшчотай кожнае слова
Каб сэрцайка вымаўляла.
Мы ведаць усе павінны
І дзякаваць шчыра сэрцам,
Што ёсць у Сусвеце краіна –
Яна Беларуссю завецца.
А нам яна проста маці,
Таму нездарма яе трэба
І ведаць, і шанаваці…
Яна нам – і хлеб, і неба.
Яўген МАКАРЭВІЧ (Бяроза)
Маці
Жыву нібы з табою разам,
Я ў святле тваіх вачэй.
Заўжды за ўсіх была ў адказе,
Не дасыпаючы начэй.
Як многа добрых слоў хацеў я
Табе сказаць, ды вось не змог.
Ты зразумець і так умела
Прычыны ўсіх маіх трывог.
Я ў думках часта ўспамінаю
Цябе, шкадуючы ў журбе.
«Прабач мне, – ціха паўтараю, –
За ўсё прабач, прашу цябе».
Бацька
Няўжо я цябе не сустрэну ніколі,
Няўжо нас навекі разлучвае лёс?
Шуміць без цябе колькі год ужо поле,
Пра сум і пра боль шэпча лісце бяроз.
Няўжо мы не будзем ісці па узмежках,
Глядзець, як навокал цвітуць верасы?
Даўно ўжо не бачыў тваёй я ўсмешкі,
Той яснай і чыстай, як кропля расы.
А сэрца сціскаецца жалем і болем:
З табой развіталіся мы ўжо навек.
Няўжо я цябе не ўбачу ніколі,
Мой бацька, такі дарагі чалавек?..
Комментарии
Авторизуйтесь для комментирования
С 1 декабря 2018 г. вступил в силу новый закон о СМИ. Теперь интернет-ресурсы Беларуси обязаны идентифицировать комментаторов с привязкой к номеру телефона. Пожалуйста, зарегистрируйте или войдите в Ваш персональный аккаунт на нашем сайте.