Хрыстос уваскрос! Сапраўды ўваскрос!

Ці выпадкова гэта, сябры, што свята Уваскрасення Хрыстовага прыпадае менавіта на вясну? Калі вакол нас усё абуджаецца да жыцця, калі кожная галінка, кожная сцяблінка, кожная птушачка і кожная кузурка ўсёй сваёй сутнасцю імкнуцца жыць, гэтае імкненне перадаецца і людзям. І як найвялікшае сцвярджэнне жыцця – не толькі зямнога, але і нябеснага, вечнага – увесну мы ўзгадваем Уваскрасенне нашага Госпада Ісуса Хрыста. Хрыстос уваскрос, і мы ўваскрэснем разам з Ім – гэтая ўпэўненасць дапамагала і хрысціянам часоў Нерона і Даміцыяна, і вернікам у гады бязбожнай бальшавіцкай улады, і сённяшнім пакутнікам у Паўночнай Карэі, Кітаі, многіх мусульманскіх краінах. Дзякуй Богу, што нашая вера не патрабуе такіх пацверджанняў коштам свайго жыцця, але няхай яна не будзе ад гэтага менш моцнай. Няхай цепліцца ў душах агеньчык Хрыстовай любові, падмацаваны Божым Словам, і хай ад нашай веры саграюцца сэрцы тых, хто побач з намі. Гэта і будзе бадай што лепшым сведчаннем таго, што Хрыстос сапраўды ўваскрос.